Një punonjës i Inspektoratit të Mbrojtjes së Territorit në Berat është arrestuar në flagrancë ditën e sotme pasi dyshohet të ketë marrë ryshfet për të shmangur gjobën për një ndërtim pa lejë.
Sipas njoftimit të Prokurorisë së Beratit, inspektori P.K., ka përfituar shumën monetare në vlerë 20 mijë lekë nga shtetasi Th.Gj., i cili dhe kallëzoi rastin e korrupsionit.
Shuma e parave është sekuestruar nga blutë në cilësinë e provës materiale.
Njoftimi:
Prokuroria pranë Gjykatës së Shkallës së Parë të Juridiksionit të Përgjithshëm Berat në kuadër të procedimit penal me nr.339 të vitit 2024, në bashkëpunim dhe me Oficerët e krimit ekonomik pranë Drejtorisë Vendore të Policisë Berat, ka arrestuar në flagrance shtetasin P.K. me detyrë inspektor në Inspektoratin e Mbrojtjes së Territorit Berat.
Arrestimi i tij u bë për veprat penale të “Shpërdorim detyre” parashikuar nga neni 248 i K.Penal dhe “Korrupsion pasiv i personave që ushtrojnë funksione publike” parashikuar nga neni 259 i K.Penal, pasi në mënyrë të paligjshme ka përfituar një shumë prej 20.000 lekësh nga kallezuesi, shtetasi Th.Gj. kundrejt shmangies së gjobës administrative për një ndërtim të dyshuar pa leje që kallëzuesi po kryente.
Falë bashkepunimit të kallëzuesit si dhe përdorimit të veprimeve simuluese u dokumentua ngjarja dhe u sekuestrua në cilësinë e provës materiale shuma e parave.
Prokuroria pranë Gjykatës së Shkallës së Parë të Juridiksionit të Përgjithshëm, Berat gjen rastin të inkurajojë të gjithë qytetarët për të denoncuar praktikat korruptive dhe shpreh vullnetin e saj të palëkundur në luftën kundër korrupsionit.
